創世記9:1-29＠台語處境查經班

Choân Tâi-gí Chhú-kéng Cha-keng-pan (全台語處境查經班)

The CBS’ Sandwich：See – Judge – Act

Hia̍p-tiau-chiá：黃春生/N̂g Chhun-Seng、林世鴻/Lîm Sè-Hông

Sèng-si：622《Chì-toā Siōng-tè goān Lí chhōa góa》

Keng-bûn：Chhòng-sè-kì 9:1-29《Choân-bîn Tâi-gí Sèng-keng》

Siōng-tè kah Nó͘-ah Tēng Khè-iok

9:1Siōng-chú sù-hok hō͘ Nó͘-ah kah i ê kiáⁿ, mā tùi in kóng, " Lín tio̍h seng-thòaⁿ chin chē, chhiong-móa tē chiūⁿ. 

9:2 Kiàn-nā tē chiūⁿ ê cháu-siù kah thiⁿ-téng ê chiáu, lóng ē kiaⁿ-ùi lín; liân tē chiūⁿ it-chhè ê thâng-thōa kah hái-.ni̍h it-chhè ê hî, lóng beh kau-hù tī lín ê chhiú. 

9:3 Kiàn-nā oa̍h ê tōng-bu̍t lóng chò lín ê chia̍h-mi̍h, chiah-ê it-chhè góa lóng beh chò lín ê chia̍h-mi̍h. Chiah-ê it-chhè Góa lóng beh hō͘ lín, chhin-chhiūⁿ Góa hō͘ lín chhài-se kāng-khoán. 

9:4 Chóng-.sī, ū oa̍h-miā ê bah, chiū-sī ū kâⁿ hoeh ê, lín m̄-thang chia̍h. 

9:5 Lâu lín ê hoeh, chiū-sī lâu lín oa̍h-miā ê hoeh ê chōe, Góa beh kā i thó. Góa beh tùi ta̍k iūⁿ ê cháu-siù thó, mā beh tùi lâng ê chhiú, í-ki̍p ta̍k lâng hiaⁿ-tī ê chhiú, lâi thó- âng ê oa̍h-miā. 

9:6 Kiàn-nā hō͘ lâng lâu hoeh ê, lâng mā beh hō͘ i lâu hoeh, in-ūi Siōng-tè chō lâng, sī chhin-chhiūⁿ I ka-kī ê siōng. 

9:7 Lín tio̍k seng-thòaⁿ chin chē, tī tē-bīn chiūⁿ tio̍h heng-ōng, ke-thiⁿ chin chē. "

9:8 Siōng-tè kā Nó͘-ah kah i ê kiáⁿ kóng, 

9:9 " Góa beh kah lín í-ki̍p lín ê kiáⁿ-sun li̍p Góa ê iok; 

9:10 Mā beh kah hiah-ê kah lín chò-hóe ê it-chhè oa̍h-mi̍h, chiū-sī kah lín tī-.leh ê poe-chiáu, cheng-seⁿ, í-ki̍p it-chhè ê cháu-siù; kiàn-nā tùi tōa chûn chhut-lâi tē chiūⁿ ê it-chhè cháu-siù li̍p-iok. 

9:11 Góa kah lín li̍p Góa ê iok, kiàn-nā ū jio̍k-thé ê, bē koh hō͘ tōa-chúi bia̍t-bông, mā bô koh ū tōa-chúi húi-hoāi thó͘-tē. "

9:12 Siōng-tè kóng, " Góa kah lín mā kah hiah-ê kah lín tông-chāi ê ta̍k chióng oa̍h-mi̍h só͘ li̍p éng sè-tāi ê iok, sī ū kì-hō ê. 

9:13 Góa kā Góa ê khēng hē tī hûn ni̍h, thang chò Góa kah tē li̍p-iok ê kì-hō. 

9:14 Í-āu góa hō͘ hûn khí-lâi cha̍h tē ê sî, ē ū khēng chhut-hiān tī hûn ni̍h, 

9:15 Góa chiū ē kì-tit Góa kah lín í-ki̍p ta̍k chióng ū jio̍k-thé ê oa̍h-mi̍h só͘ li̍p ê iok, chúi bô koh hoàn-lām, sún-hoāi it-chhè ū jio̍k-thé ê mi̍h. 

9:16 Khēng ē chhut-hiān tī hûn ni̍h, Góa beh khòaⁿ i, hō͘ Góa kì-liām Siōng-tè kah tē chiūⁿ ta̍k chióng ū jio̍k-thé ê oa̍h-mi̍h só͘ li̍p éng-oán ê iok. "

9:17 Siōng-tè tùi Nó͘-ah kóng, " Che chiū-sī Góa kah tē chiūⁿ it-chhè ū jio̍k-thé ê mi̍h só͘ li̍p ê iok ê kì-hō. "

Nó͘-ah ê Kiáⁿ-jî

9:18Nó͘-ah ê kiáⁿ kah i chò-hóe chhut tōa chûn ê, chiū-sī Sé-mh, Hâm, Iá-hia̍t. Hâm sī Ka-nân ê lāu-pē. 

9:19 Chit saⁿ-ê sī Nó͘-ah ê kiáⁿ, tùi in chhut ê kiáⁿ-sun phiàn-móa choân tē. 

9:20 Nó͘-ah khí-thâu chò lông-hu, chai-chèng phû-tô hn̂g. 

9:21 I lim chiú-chùi, thǹg-pak-theh tó tī pò͘-pêⁿ lāi. 

9:22 Ka-nân ê lāu-pē — Hâm, khòaⁿ in lāu-pē thǹg-pak-theh, chiū khì gōa-bīn kā in nn̄g-ê hiaⁿ-tī kóng. 

9:23 Sé-mh kah Iá-hia̍t the̍h chi̍t-niá saⁿ, khòa tī in ê keng-kah-thâu, tò-thè kiâⁿ lâi cha̍h lāu-pē ê seng-khu, in ê bīn hiòng gōa-kháu, bô khòaⁿ-tio̍h lāu-pē thǹg-pak-theh. 

9:24 Nó͘-ah chiú-chùi chhéⁿ, chiah chai tē-jī kiáⁿ ê só͘ chò. 

9:25 Chiū kóng, " Ka-nân tio̍h siū chiù-chó͘, i ē chò i ê hiaⁿ-tī lô͘-po̍k ê lô͘-po̍k. " Koh kóng, 

9:26 " Tio̍h o-ló Siōng-chú — Sé-mh ê Siōng-tè, Ka-nân chò Sé-mh ê lô͘-po̍k. 

9:27 Goān Siōng-tè hō͘ Iá-hia̍t hoat-tián, hō͘ i tòa tī Sé-mh ê pò͘-pêⁿ, Ka-nân mā chò i ê lô͘-po̍k. "

9:28 Tōa chúi liáu-āu, Nó͘-ah koh-chài oa̍h saⁿ-pah gō͘-cha̍p nî. 

9:29 Nó͘-ah chia̍h kàu káu pah gō͘-cha̍p hòe chiah sí. 

Būn-tôe thó-lūn：

一、Tùi chi̍t-toān keng-bûn, lí ū khòaⁿ tio̍h sím-mih？(jîn-bu̍t, chú-tê…) lí kám-kak ū sím-mih ta̍t- tit su-khó ê būn-tôe？

在這段經文中，你有看到什麼？(人物、主題)你感覺有哪些值得思考的問題？

二、9:1-7 ê keng-bûn thó-lūn jîn-lūi kah kî-tha sèⁿ-miā(性命) chi-kan ê koan-hē kah Siōng-chú hō͘-lâng ê goân-chek. Chi̍t-toān keng-bûn hō͘ lán tong-tāi ū sím-mih khé-hoat？(chhin-chhiūⁿ: lâng kah chū-jiân, sèⁿ-miā-koân téng-téng)

9:1-7的經文討論人類與其他生命之間的關係及上主給的原則。這段經文給我們當代有哪些啟發？(例如:人與自然、生命權等等)

三、9:8-17 thê-kàu Siōng-chú kah sīu-chō-mih “li̍p-iok”, Tī chit-pái “li̍p-iok” kòe-têng tiong, ū sím-mih te̍k-sek？lēng-gōa, tī chia ê “li̍p-iok” koan-liām ē-tàng cháiⁿ-iūⁿ èng-iōng tī láng ê chhú-kéng？

9:8-17 提到上主和受造物「立約」。在這次「立約」過程中，有哪些特色？此外，這裡的「立約」觀念可以怎樣應用在我們的處境？

四、Nó͘-ah tùi ka-kī saⁿ ê kiáⁿ-jî ê chiù-chó͘ kah chiok-hok, ū sím-mih ì-gī？

挪亞對自己三個兒子的詛咒和祝福，有什麼意義？

Chhòng-sè-kì 6:1-22

Choân Tâi-gí Chhú-kéng Cha-keng-pan (全台語處境查經班)

The CBS’ Sandwich：See – Judge – Act

Hia̍p-tiau-chiá：黃春生/N̂g Chhun-Seng、林世鴻/Lîm Sè-Hông

Sèng-si：

Keng-bûn：Chhòng-sè-kì 6:1-22《Choân-bîn Tâi-gí Sèng-keng》

Siâ-ok ê Jîn-lūi

6:1Jîn-kháu tī tē chiūⁿ ná ke-thiⁿ, mā seⁿ cha-bó͘ kiáⁿ ê sî, 

6:2 Siōng-tè ê kiáⁿ khòaⁿ-tio̍h lâng ê cha-bó͘ kiáⁿ súi, chiū chiàu in só͘ ài, chhōa in chò bó͘. 

6:3 Siōng-chú kóng, " Lâng kì-jiân sio̍k tī jio̍k-thé, Góa ê Sèng Sîn bô beh éng-oán tiàm tī in; m̄-koh, in ê ji̍t-chí teh beh kàu chi̍t-pah jī-cha̍p nî. "

6:4 Tī hit sî kah í-āu, ū tōa-hàn lâng tòa tī tē-bīn chiūⁿ, in sī Siōng-chú ê kiáⁿ kah lâng ê cha-bó͘ kiáⁿ tâng-pâng só͘ seⁿ ê kiáⁿ; in sī kó͘-chá ê eng-hiông kah ū miâ-siaⁿ ê lâng. 

6:5 Siōng-chú khòaⁿ-tio̍h lâng tī tē chiūⁿ, chōe-ok chin tōa, sim lāi só͘ siūⁿ ê liām-thâu ta̍k ji̍t lóng sī pháiⁿ ê. 

6:6 Siōng-chú hō͘-hóe I chō lâng tī sè-kan, sim lāi iu-būn. 

6:7 Siōng-chú kóng, " Góa beh tùi tē-bīn chiūⁿ châu-bia̍t Góa só͘ chhòng-chō ê lâng, kā lâng kah cháu-siù, thâng-thōa, poe-chiáu, lóng châu-bia̍t; in-ūi Góa chō in liáu-āu ū hō͘-hóe. 

6:8 Chí-ū Nó͘-ah tī Siōng-chú ê bīn-chêng tit-tio̍h un-tián. 

Nó͘-ah ê Kò͘-sū

6:9Nó͘-ah ê sè-hē kì tī ē-té: Nó͘-ah sī gī lâng, tī hit sè-tāi ê tiong-kan sī oân-choân ê lâng; nó͘-ah kah Siōng-tè chò-hóe kiâⁿ. 

6:10 Nó͘-ah seⁿ saⁿ-ê kiáⁿ, chiū-sī Sé-mh, Hâm, Iá-hia̍t. 

6:11 Sè-kài tī Siōng-chú ê bīn-chêng pāi-hoāi, sè-kài chhiong-móa kiông-pō. 

6:12 Siōng-tè khòaⁿ sè-kài lóng teh pāi-hoāi, in-ūi kiàn-nā ū jio̍k-thé ê in tī sè-kài ê hêng-ûi lóng sī pāi-hoāi. 

6:13 Siōng-tè tùi Nó͘-ah kóng, " Kiàn-nā ū jio̍k-thé ê, Góa khòaⁿ in ê boa̍t-ji̍t í-keng kàu, in-ūi in ê kiông-pō chhiong-móa tī sè-kài. Lí khòaⁿ, Góa beh kā in kah tē chò chi̍t-ē húi-bia̍t. 

6:14 Lí tio̍h ēng chhêng-peh chhâ chò tōa chûn, chûn lāi tio̍h keh pâng-keng, lāi-gōa ēng tá-má-ka iû kā i kô͘. 

6:15 Tōa-chûn ê chō-hoat sī án-ne: Tn̂g saⁿ-pah tiú, khoah gō͘-cha̍p tiú, koân saⁿ-cha̍p tiú. 

6:16 Chûn tio̍h chò thang-á, koân chi̍t tiú; mn̂g tio̍h hē tī chûn-piⁿ, chûn tio̍h chò saⁿ chàn, hun siōng, tiong, hā. 

6:17 Lí khòaⁿ! Góa beh hō͘ tōa-chúi hoàn-lām tī tē chiūⁿ, lâi húi-bia̍t thian-hā kiàn-nā ū oa̍h-khì ê jio̍k-thé, kiàn-nā tī tē chiūⁿ ê lóng ē sí. 

6:18 Chóng-.sī, Góa beh kah lí li̍p Góa ê iok; lí kah lí ê kiáⁿ, lí ê bó͘, lí ê sim-pū, lóng tio̍h ji̍p tōa chûn. 

6:19 Kiàn-nā ū oa̍h-khì ê jio̍k-thé, ta̍k chióng chi̍t tùi, chi̍t chiah kang ê, chi̍t chiah bó ê, lí tio̍h tòa in ji̍p tōa chûn kah lí chò-hóe pó-choân oa̍h-miā. 

6:20 Poe-chiáu kok chiàu i ê lūi, cheng-seⁿ kok chiàu i ê lūi, tē chiūⁿ ê thâng-thōa kok chiàu i ê lūi, ta̍k chióng chi̍t tùi beh kàu lí hia, lâi pó-choân in ê oa̍h-miā. 

6:21 Lí tio̍h the̍h ta̍k chióng ê chia̍h-mi̍h chek-chū teh, thang chò lí kah in ê chia̍h-mi̍h. "

6:22 Nó͘-ah chiū án-ne kiâⁿ, chiàu Siōng-chú só͘-ū ê bēng-lēng khì kiâⁿ. 

Būn-tôe thó-lūn：

一、Tùi chi̍t-toān keng-bûn, lí ū khòaⁿ tio̍h sím-mih？(jîn-bu̍t, chú-tê…)

二、“Siōng-tè ê kiáⁿ khòaⁿ-tio̍h lâng ê cha-bó͘ kiáⁿ súi, chiū chiàu in só͘ ài, chhōa in chò bó͘. ” chit ê tāi-chì uī-hô hō͘ Siōng-chú khòaⁿ-chò siâ-ok, beh châu-bia̍t só͘ chhòng-chō ê lâng？

三、Siōng-chú uī-hô ài Nó͘-ah chō tōa-chûn？I ê bo̍k-tek sī sím-mih？

四、Tī hiān-tāi ê chhú-kéng tiong, lūi-sū ê siâ-ok sī sím-mih？

五、Tī hiān-tāi ê chhú-kéng tiong, Nó͘-ah tī tah-lo̍h？Tōa-chûn tī tah-lo̍h？

Chhòng-sè-kì 5:1-32@Choân Tâi-gí Chhú-kéng Cha-keng-pan

Choân Tâi-gí Chhú-kéng Cha-keng-pan (全台語處境查經班)

The CBS’ Sandwich：See – Judge – Act

Hia̍p-tiau-chiá：黃春生/N̂g Chhun-Seng、林世鴻/Lîm Sè-Hông

Sèng-si：

Keng-bûn：Chhòng-sè-kì 5:1-32《Choân-bîn Tâi-gí Sèng-keng》

A-tám ê Ka-phó͘

5:1A-tám ê sè-hē kì tī ē-té: Tng Siōng-tè chhòng-chō lâng ê ji̍t, sī chiàu Siōng-tè ê khoán-sit lâi chō lâng. 

5:2 Siōng-tè chhòng-chō in ū cha-po͘ kah cha-bó͘, tī in siū chhòng-chō ê ji̍t, sù in hok-khì, chheng in ê miâ kiò-chò lâng. 

5:3 A-tám chi̍t-pah saⁿ-cha̍p hòe ê sî, seⁿ kiáⁿ chiàu i ê khoán, chhin-chhiūⁿ i ê siōng, hō-miâ kiò-chò Siat. 

5:4 A-tám seⁿ Siat liáu-āu koh keng-kòe peh pah nî, kî-tiong iáu ū seⁿ kiáⁿ-jî. 

5:5 A-tám chia̍h kàu káu pah saⁿ cha̍p hòe chiah sí. 

5:6 Siat chi̍t-pah khòng gō͘ hòe, seⁿ Ê-nó͘-suh. 

5:7 Siat seⁿ Ê-nó͘-suh liáu-āu iáu-koh oa̍h peh pah khòng chhit nî, kî-tiong ū koh seⁿ kiáⁿ-jî. 

5:8 Siat chia̍h kàu káu pah cha̍p jī hòe chiah sí. 

5:9 Ê-nó͘-suh káu-cha̍p hòe ê sî, seⁿ Kai-nân. 

5:10 Ê-nó͘-suh seⁿ Kai-nân liáu-āu iáu-koh oa̍h peh pah cha̍p-gō͘ nî, kî-tiong ū koh seⁿ kiáⁿ-jî. 

5:11 Ê-nó͘-suh chia̍h kàu káu pah khòng gō͘ hòe chiah sí. 

5:12 Kai-nân chhit-cha̍p hòe ê sî, seⁿ Mâ-lé-lel. 

5:13 Kai-nân seⁿ Mâ-lé-lel liáu-āu iáu-koh oa̍h peh pah sì-cha̍p nî, kî-tiong ū koh seⁿ kiáⁿ-jî. 

5:14 Kai-nân chia̍h kàu káu pah cha̍p hòe chiah sí. 

5:15 Mâ-lé-lel la̍k-cha̍p-gō͘ hòe ê sî, seⁿ Iá-lia̍t. 

5:16 Mâ-lé-lel seⁿ Iá-lia̍t liáu-āu iáu-koh oa̍h peh pah saⁿ-cha̍p nî, kî-tiong ū koh seⁿ kiáⁿ-jî. 

5:17 Mâ-lé-lel chia̍h kàu peh pah káu-cha̍p-gō͘ hòe chiah sí. 

5:18 Iá-lia̍t chi̍t-pah la̍k-cha̍p-jī hòe ê sî, seⁿ Ê-no͘k. 

5:19 Iá-lia̍t seⁿ Ê-no͘k liáu-āu iáu-koh oa̍h peh pah nî, kî-tiong ū koh seⁿ kiáⁿ-jî. 

5:20 Iá-lia̍t chia̍h kàu káu pah la̍k-cha̍p-jī hòe chiah sí. 

5:21 Ê-no͘k la̍k-cha̍p-gō͘ hòe, seⁿ Me-thu-se-la̍h. 

5:22 Ê-no͘k seⁿ Me-thu-se-la̍h liáu-āu, koh kah Siōng-chú chò-hóe kiâⁿ saⁿ pah nî, kî-tiong ū koh seⁿ kiáⁿ-jî. 

5:23 Ê-no͘k chia̍h kàu saⁿ-pah la̍k-cha̍p-gō͘ hòe. 

5:24 Ê-no͘k kah Siōng-chú chò-hóe kiâⁿ, Siōng-chú chiap i khì, i chiū bô tī-.leh. 

5:25 Me-thu-se-la̍h chi̍t-pah peh cha̍p-chhit hòe ê sî, seⁿ Le-me̍k. 

5:26 Me-thu-se-la̍h seⁿ Le-me̍k liáu-āu iáu-koh oa̍h chhit-pah peh-cha̍p-jī nî, kî-tiong ū koh seⁿ kiáⁿ-jî. 

5:27 Me-thu-se-la̍h chia̍h kàu káu-pah la̍k-cha̍p-káu hòe chiah sí. 

5:28 Le-me̍k chi̍t-pah peh-cha̍p-jī hòe ê sî, seⁿ chi̍t-ê kiáⁿ, 

5:29 Hō-miâ kiò-chò Nó͘-ah. I kóng, " Siōng-chú bat chiù-chó͘ tē, hō͘ lán chò kang lô-khó͘, taⁿ chit-ê kiáⁿ beh an-ùi lán. "

5:30 Le-me̍k seⁿ Nó͘-ah liáu-āu iáu-koh oa̍h gō͘-pah káu-cha̍p-gō͘ nî, kî-tiong ū koh seⁿ kiáⁿ-jî. 

5:31 Le-me̍k chia̍h kàu chhit-pah chhit-cha̍p-chhit hòe chiah sí. 

5:32 Nó͘-ah gō͘ pah hòe ê sî, seⁿ Sé-mh, Hâm, Iá-hia̍t. 

Būn-tôe thó-lūn：

一、Tùi chi̍t-toān keng-bûn, lí ū khòaⁿ tio̍h sím-mih？(jîn-bu̍t, chú-tê…)

二、Chi̍t-toān keng-bûn tiong ê sò͘-jī kah nî-lêng, kam-ū te̍k-pia̍t ê ì-gī？Jû-hô lí-kái kó͘-chá-lâng ê tn̂g-hòe-siū？

三、Ūi-hô chok-chiá tùi Nó͘-ah ū te̍k-pia̍t ê biâu-su̍t, chit-khoán ê biâu-su̍t ū sím-mih ì-gī？

四、“A-tám ê Ka-phó͘ ”kah “Kai-ín ê Ka-phó͘ ” (4:16-24) ū sím-mih chha-īⁿ, keng-bûn ê biâu-su̍t ū sím-mih ì-gī？

五、Chi̍t-toān keng-bûn só͘ beh thoân-ta̍t ê ì-gī, tī lán ê seng-oa̍h tiong ē-tàng jû-hô si̍t-chiān？

Chhòng-sè-kì 4:1-26@Choân Tâi-gí Chhú-kéng Cha-keng-pan

Choân Tâi-gí Chhú-kéng Cha-keng-pan (全台語處境查經班)

The CBS’ Sandwich：See – Judge – Act

Hia̍p-tiau-chiá：黃春生/N̂g Chhun-Seng、林世鴻/Lîm Sè-Hông

Sèng-si：

Keng-bûn：Chhòng-sè-kì 4:1-26《Choân-bîn Tâi-gí Sèng-keng》

Kai-ín kah A-bel

4:1Hit-ê lâng kah i ê bó͘ E-bah tâng-pâng, E-bah chiū hoâi-īn seⁿ Kai-ín, kóng, " Góa tùi Siōng-chú ê pó-siú tit-tio̍h kiáⁿ. "

4:2 I koh seⁿ i ê sió-tī A-bel. A-bel sī kò͘ iûⁿ ê, Kai-ín sī chò-chhân ê. 

4:3 Ū chi̍t kang, Kai-ín ēng lông-sán-bu̍t chò lé-mi̍h hiàn hō͘ Siōng-chú. 

4:4 A-bel mā kā iûⁿ-kûn tiong thâu-chiūⁿ seⁿ ê iûⁿ kah i ê iû the̍h-lâi hiàn. Siōng-chú kah-ì A-bel kah i ê lé-mi̍h; 

4:5 Chóng-.sī, bô kah-ì Kai-ín kah i ê lé-mi̍h. Kai-ín chiū tōa siū-khì, pìⁿ-bīn. 

4:6 Siōng-chú tùi Kai-ín kóng, " Lí án-chóaⁿ teh siū-khì? Lí ná ē pìⁿ-bīn? 

4:7 Lí nā kiâⁿ hó, kám bē tit-tio̍h kàm-la̍p? Nā bô kiâⁿ hó, chōe-gia̍t ē bâi-ho̍k tī mn̂g-kháu, i ē loân-bō͘ lí, lí ē hō͘ i koán-hat. "

4:8 Kai-ín kā i ê sió-tī kóng, " Lán chhut lâi-khì chhân-hn̂g! ". In lâi-kàu chhân-hn̂g ê sî, Kai-ín kong-kek i ê sió-tī A-bel, kā i thâi-sí. 

4:9 Siōng-chú tùi Kai-ín kóng, " Lí ê sió-tī A-bel tī tó-ūi? " Kai-ín ìn kóng, " Góa m̄-chai, góa kám sī kò͘-siú góa ê sió-tī ê? "

4:10 Siōng-chú kóng, " Lí ū chò siáⁿ-mi̍h tāi-chì? Lín sió-tī ê hoeh ê siaⁿ, tùi tē-.ni̍h tōa-siaⁿ hoah Góa. 

4:11 Tē ū khui chhùi tùi lí ê chhiú chiap-siū lín sió-tī ê hoeh, taⁿ lí chit-ê tē ē siū chiù-chó͘. 

4:12 Lí chèng-choh, tē bô beh chhut lông-sán-bu̍t hō͘ lí, lí tio̍h sì-kè cháu, phiau-liû tē chiūⁿ. "

4:13 Kai-ín tùi Siōng-chú kóng, " Góa ê hêng-hoa̍t siuⁿ tāng, chhiau-kòe góa ē-tàng tam-tng ê. 

4:14 Lí kin-á-ji̍t kóaⁿ góa lī-khui chit-ê tē-bīn, hō͘ góa bô thang tòa tī Lí ê bīn-chêng. Góa sì-kè cháu, phiau-liû tē chiūⁿ, só͘-ū tú-tio̍h góa ê lóng beh kā góa thâi-sí. "

4:15 Siōng-chú tùi i kóng, " Bē án-ne, kiàn-nā thâi-sí Kai-ín ê, ē siū chhit pōe ê pò-èng. " Siōng-chú chiū kā Kai-ín li̍p chi̍t-ê kì-hō, bián-tit tú-tio̍h i ê lâng beh kā i thâi-sí. 

4:16 Kai-ín chiū lī-khui Siōng-chú ê bīn-chêng, khì tòa tī E-tiân ê tang pêng, kiò-chò Nó͘-toh ê tē. 

Kai-ín ê Ka-phó͘

4:17Kai-ín kah i ê bó͘ tâng-pâng, i ê bó͘ hoâi-īn seⁿ Ê-no͘k. Kai-ín khí siâⁿ, chiū chiàu i ê kiáⁿ ê miâ, kā hit-ê siâⁿ kiò-chò Ê-no͘k. 

4:18 Ê-no͘k seⁿ I-la̍t, I-la̍t seⁿ Me-hu-ia-el, Me-hu-ia-el seⁿ Má-thó͘-sat-lī, Má-thó͘-sat-lī seⁿ Le-me̍k. 

4:19 Le-me̍k chhōa nn̄g-ê bó͘, chi̍t-ê miâ kiò A-tah, chi̍t-ê miâ kiò Ché-la̍h. 

4:20 A-tah seⁿ Iâ-bal, i chiâⁿ-chò tòa pò͘-pêⁿ chhī cheng-seⁿ ê lâng ê chó͘-sian. 

4:21 I ê sió-tī miâ kiò Iu-bal, i sī só͘-ū tôaⁿ-khîm pûn-siau ê lâng ê chó͘-sian. 

4:22 Ché-la̍h mā seⁿ Thô͘-bal-kai-ín; i sī chè-chō ta̍k chióng tâng, thih lāi-khì ê lâng ê chó͘-sian; Thô͘-bal-kai-ín ê chí-mōe sī Ná-má. 

4:23 Le-me̍k tùi i nn̄g-ê bó͘ kóng, " A-tah kah Ché-la̍h, tio̍h thiaⁿ góa ê siaⁿ, Le-me̍k ê bó͘, tio̍h tì-ì thiaⁿ góa ê ōe. Lâng siong góa, góa kā i thâi; siàu-liân lâng hāi góa, góa kā i thâi. 

4:24 Kai-ín ê pò-oan nā-sī chhit pōe, án-ne Le-me̍k ê pò-oan it-tēng tio̍h chhit-cha̍p-chhit pōe. "

Siat kah Ê-nó͘-suh

4:25A-tám koh kah i ê bó͘ tâng-pâng, i ê bó͘ seⁿ kiáⁿ, hō-miâ kiò-chò Siat, ì-sù sī kóng, " Siōng-tè koh kā góa siat-li̍p chi̍t-ê kiáⁿ lâi tāi-thè A-bel, in-ūi Kai-ín kā A-bel thâi-sí. "

4:26 Siat mā seⁿ kiáⁿ, hō-miâ kiò-chò Ê-nó͘-suh. Hit sî, lâng chiah khai-sí kiû-kiò " I-é-ho-bah "ê miâ.

Būn-tôe thó-lūn：

一、Tùi chi̍t-toān keng-bûn, lí ū khòaⁿ tio̍h sím-mih？(jîn-bu̍t, chú-tê…)

二、Ūi-hô Siōng-chú kah-ì A-bel kah i ê lé-mi̍h(4:4)，kū-choa̍t Kai-ín kah i ê lé-mi̍h(4:5)？

三、“Lín sió-tī ê hoeh ê siaⁿ, tùi tē-.ni̍h tōa-siaⁿ hoah Góa”(4:10)Chit-kù-oē tùi lán ū sím-mih khé-hoat？

四、“Siōng-chú kā Kai-ín li̍p chi̍t-ê kì-hō, bián-tit tú-tio̍h i ê lâng beh kā i thâi-sí” (4:15) Chit-kù-oē tùi lán ū sím-mih khé-hoat？

五、Tī kim-ji̍t ū sím-mih lūi-sū chhú-kéng, lí ē án-chóaⁿ hôe-èng？

Chhòng-sè-kì 1:1-31@Choân Tâi-gí Chhú-kéng Cha-keng-pan

Choân Tâi-gí Chhú-kéng Cha-keng-pan (全台語處境查經班)

The CBS’ Sandwich：See – Judge – Act

Hia̍p-tiau-chiá：黃春生/N̂g Chhun-Seng、林世鴻/Lîm Sè-Hông

Sèng-si：

Keng-bûn：Chhòng-sè-kì 1:1-31《Choân-bîn Tâi-gí Sèng-keng》

1:1 Goân-khí-thâu Siōng-tè chhòng-chō thiⁿ kap tōe.

1:2 Tōe sī khang-khang hūn-tūn; chhim-ian ê bīn-chiūⁿ o͘-àm; Siōng-tè ê Sîn ūn-tōng tī chúi-bīn.

1:3 Siōng-tè kóng, Tio̍h ū kng, chiū ū kng.

1:4 Siōng-tè khòaⁿ kng, sī hó; Siōng-tè chiong kng àm pun-khui.

1:5 Siōng-tè kiò hit ê kng chòe Ji̍t, kiò àm chòe Mî. Ū ê-hng ū chá-khí, sī thâu chi̍t-ji̍t.

1:6 Siōng-tè kóng, Chiah ê chúi ê tiong-kan tio̍h ū kiong-chhong, chiong chúi kap chúi pun-khui.

1:7 Siōng-tè chiū chō kiong-chhong, lâi hun-khui kiong-chhong-ē ê chúi kap kiong-chhong-téng ê chúi; chiū ū án-ni.

1:8 Siōng-tè kiò kiong-chhong chòe Thiⁿ. Ū ê-hng ū chá-khí, sī tē-jī ji̍t.

1:9 Siōng-tè kóng, Thiⁿ-ē chiah ê chúi tio̍h chū-chi̍p kàu chi̍t só͘-chāi, ta-tōe tio̍h chhut-hiān; chiū ū án-ni.

1:10 Siōng-tè kiò ta-tōe chòe Tōe; kiò chū-chi̍p ê chúi chòe Hái; Siōng-tè khòaⁿ-i sī hó.

1:11 Siōng-tè kóng, Tōe tio̍h hoat-chháu, í-ki̍p kiat-chí ê chhài-soe, kap chiàu-lūi siⁿ ké-chí ê chhiū, hit lāi-bīn ū i ê chí, tī tōe-chiūⁿ; chiū ū án-ni.

1:12 Tōe chiū hoat-chháu, kap chiàu-lūi kiat-chí ê chhài-soe, kap chiàu-lūi siⁿ ké-chí ê chhiū, lāi-bīn ū i ê chí; Siōng-tè khòaⁿ-i sī hó.

1:13 Ū ê-hng ū chá-khí, sī tē-saⁿ ji̍t.

1:14 Siōng-tè kóng, Thiⁿ-ni̍h ê kiong-chhong tio̍h ū hoat-kng ê thé, lâi hun-piat ji̍t-mî; iā thang chòe tiāu-thâu, sù-kùi, ji̍t, nî;

1:15 ia̍h hō͘ in chòe kng-thé tī thiⁿ ê kiong-chhong, chiò-kng tī tōe-chiūⁿ; chiū ū án-ni.

1:16 Siōng-tè chiū chō tōa ê kng-thé nn̄g-ê; tōa ê kng-thé lâi koán ji̍t-sî, sòe ê kng-thé lâi koán mî-sî; iā chō chhiⁿ-sîn.

1:17 Siōng-tè hē in tī thiⁿ-ni̍h ê kiong-chhong, hō͘ in chiò kng tī tōe-ni̍h;

1:18 iā beh koán ū ji̍t mî, hun-piat kng àm. Siōng-tè khòaⁿ-i sī hó.

1:19 Ū ê-hng ū chá-khí, sī tē-sì ji̍t.

1:20 Siōng-tè kóng, Chúi tio̍h siⁿ-thòaⁿ chōe-chōe ū oa̍h-miā ê tōng-bu̍t; chiáu pe tī tōe ê téng-bīn, thiⁿ-ni̍h ê kiong-chhong.

1:21 Siōng-tè chiū chhòng-chō hái-ni̍h ê tōa-hî, í-ki̍p chúi só͘ siⁿ chōe-chōe ū oa̍h-miā ê tōng-bu̍t, kok chiàu i ê lūi, koh chhòng-chō ta̍k-iūⁿ ê pe-chiáu, chiàu i ê lūi; Siōng-tè khòaⁿ-i sī hó.

1:22 Siōng-tè sù-hok in, kóng, Tio̍h siⁿ-thòaⁿ ke-thiⁿ chin-chōe, chhiong-móa tī hái-ni̍h ê chúi, iā hō͘ chiáu-chiah siⁿ-thòaⁿ chōe-chōe tī tōe-ni̍h 

1:23 Ū ê-hng ū chá-khí, sī tē-gō͘ ji̍t.

1:24 Siōng-tè kóng, Tōe tio̍h siⁿ ū oa̍h-miā ê tōng-bu̍t, chiàu i ê lūi, cheng-siⁿ, thâng-thōa, tōe-chiūⁿ ê cháu-siù, chiàu i ê lūi; chiū ū án-ni.

1:25 Siōng-tè chiū chō tōe-chiūⁿ ê cháu-siù chiàu i ê lūi, cheng-siⁿ chiàu i ê lūi, tōe-chiūⁿ it-chhè ê thâng-thōa chiàu i ê lūi; Siōng-tè khòaⁿ-i sī hó.

1:26 Siōng-tè kóng, Lán tio̍h chō lâng chhin-chhiūⁿ lán ê siōng, chiàu lán ê khoán; hō͘ in koán-lí hái-ni̍h ê hî, thiⁿ-ni̍h ê chiáu, kap cheng-siⁿ, kap choân-tōe, í-ki̍p tōe-chiūⁿ teh sô ê thâng-thōa.

1:27 Siōng-tè chiū chhòng-chō lâng chhin-chhiūⁿ I ka-kī ê siōng, chiàu Siōng-tè ê siōng chhòng-chō i; chhòng-chō in lâm-ê lú-ê.

1:28 Siōng-tè sù-hok in; Siōng-tè koh tùi in kóng, Tio̍h siⁿ-thòaⁿ chin-chōe, chhiong-móa tī tōe-chiūⁿ, lâi khah-iâⁿ i; iā tio̍h tī-lí hái-ni̍h ê hî, thiⁿ-ni̍h ê chiáu, kap tōe-chiūⁿ it-chhè só͘ tín-tāng ê oa̍h-mi̍h.

1:29 Siōng-tè kóng, Góa ū hō͘ lín piàn tōe-chiūⁿ it-chhè kiat-chí ê chhài-soe, koh it-chhè ê chhiū, kî-tiong ū kiat-chí ê chhiū ê ké-chí; lóng hō͘ lín chòe chia̍h-mi̍h.

1:30 Lūn-kàu tōe-chiūⁿ it-chhè ê cháu-siù, thiⁿ-tiong it-chhè ê chiáu, kap tōe-chiūⁿ it-chhè ōe tín-tāng ū oa̍h-miā ê mi̍h, Góa chiong it-chhè chhiⁿ-chháu hō͘ in chòe chia̍h-mi̍h; chiū ū án-ni.

1:31 Siōng-tè khòaⁿ I it-chhè só͘ chō-ê, khòaⁿ ah, chin-hó. Ū ê-hng ū chá-khí, sī tē-la̍k ji̍t.

Būn-tôe thó-lūn：

一、Tùi chi̍t-toān keng-bûn, lí ū khòaⁿ tio̍h sím-mih？(jîn-bu̍t, chú-tê…)

二、Tùi chi̍t-toān keng-bûn, lí ū khòaⁿ tio̍h sím-mih gî-būn？lí ê kái-tap sī sím-mih？

三、Lí jīm-ûi chok-chiá tī keng-bûn tiong siūⁿ-beh piáu-ta̍t sím-mih？

四、Lí jīm-ûi Siōng-tè chhòng-chō Tâi-oân bí-hó ê goân-hêng sī sím-mih？

五、Lán tī tó chi̍t hong-bīn, ē-tàng khoe-ho̍k Siōng-tè chhòng-chō Tâi-oân ê bí-hó iūⁿ-māu？