Lō͘-ka hok-im 10:25-37@Choân Tâi-gí Chhú-kéng Cha-keng-pan

Choân Tâi-gí Chhú-kéng Cha-keng-pan(全台語處境查經班)

The CBS’ Sandwich：See – Judge – Act

Hia̍p-tiau-chiá：黃春生/N̂g ChhunSeng、林世鴻/Lîm SèHông

Sèng-si：李新元/ LíSin-Goân  聖詩18我心讚美上帝

Keng-bûn：Lō͘-ka hok-im 10:25-37《Choân-bîn Tâi-gí Sèng-keng》

Thiàⁿ Lí ê Chhù-piⁿ

25 Ū chi̍t-ê lu̍t-hoat-kàu-su khiā khí-lâi chhì-thàm I-é-su kóng, " Lāu-su ah, góa tio̍h án-chóaⁿ chò chiah ē tit-tio̍h éng-oán ê oa̍h-miā? "

26 I-é-su ìn kóng, " Lu̍t-hoat ū kì-chài siáⁿ-mi̍h? Lí tha̍k-liáu án-chóaⁿ? "

27 Hit-ê lâng ìn kóng, " Lí tio̍h chīn-sim, chīn-sèng, chīn-la̍t, chīn-ì thiàⁿ Chú lí ê Siōng-tè, mā tio̍h thiàⁿ chhù-piⁿ chhin-chhiūⁿ ka-kī. " (chù, SBK 6, 5; LBK 19, 18)

28 I-é-su kā i kóng, " Lí só͘ ìn ê sī tio̍h, chiàu án-ne khì chò, chiū ē tit-tio̍h oa̍h-miā. "

29 M̄-koh, hit-ê lâng ài beh hián-bêng ka-kī chò liáu chin tio̍h, chiū koh mn̄g I-é-su kóng, " Siáⁿ lâng sī góa ê chhù-piⁿ? "

30 I-é-su ìn kóng, " Ū chi̍t-ê lâng tùi Ê-lú-sa-lèm lo̍h-khì I-é-lī-kho siâⁿ, tú-tio̍h thó͘-húi chhiúⁿ i ê saⁿ-khò͘, kā i phah kàu pòaⁿ-sí, jiân-āu kā i pàng hē-.leh, chò in khì. 

31 Tú-hó ū chi̍t-ê chè-si tùi hit tiâu lō͘ lo̍h-.khì, khòaⁿ-tio̍h hit-ê lâng chiū siám tùi lō͘ ê hit pêng kòe-.khì. 

32 Koh ū chi̍t-ê Lē-bī lâng kiâⁿ kàu hit só͘-chāi, khòaⁿ-liáu mā kāng-khoán tùi lō͘ ê hit pêng kòe-.khì. 

33 To̍k-to̍k ū chi̍t-ê Sa-má-lī-a lâng kiâⁿ lō͘ tùi hia keng-kòe, khòaⁿ-tio̍h chiū kā i liân-bín. 

34 I kiâⁿ óa khì, ēng chiú (Chù, ū ê chhau-pún sī " Ēng iû kah chiú ") sé tio̍h-siong ê khang-chhùi, ēng pò͘ kā i pau teh, jiân-āu hû i khí-lih khiâ ka-kī ê lî-á, chhōa i kàu kheh-tiàm lâi kā i chiàu-kò͘. 

35 Keh tńg kang, i the̍h nn̄g-ê gîn-á hō͘ tiàm-chú, kóng, ' Chhiáⁿ lí chiàu-kò͘ chit-ê lâng, só͘-hùi nā khah ke, góa tò tńg-.lâi ê sî chiah pó͘ lí. '

36 Chit saⁿ lâng tiong-kan, lí siūⁿ tó chi̍t-ê sī tú-tio̍h thó͘-húi hit-ê lâng ê chhù-piⁿ? "

37 I ìn kóng, " Kā i liân-bín hit-ê lâng chiū-sī. " I-é-su kā i kóng, " Lí khì, chiàu án-ne khì chò. "

Būn-tôe thó-lūn：

一、Tùi chi̍t-toān keng-bûn, lí ū khòaⁿ tio̍h sím-mih？

二、Lí jīn-uî lu̍t-hoat-kàu-suê tōng-ki kah būn-tôe sī sím-mih？

三、Pí-jū tiong ê Sa-má-lī-a lâng kah chè-si、Lē-bī lâng，ū sím-mih tùi-pí？

四、Tī hiān-tāi，I-é-su iā ē mn̄g lán kóng: “ sím-mih lâng sī chi̍t-êlâng ê chhù-piⁿ?”Kàu-hōeèng-kai lû-hô tùi-thāi chhù-piⁿ？

Bûn-chiuⁿ soán-tho̍k

台語教學ài趣味mā ài專業

文／蘇晏德

目前本土語言教學上蓋困難--ê，就是家長認為台語無重要，部份學校無重視本土語言，有一寡學校ê導師mā無意願配合。有外聘專業台語教師ê學校，iáu算有良心。大部份ê學校講無經費，叫學校ê老師家己教；因為無夠專業，影響學生對台語ê興趣。就算有聘請專業ê台語教師，mā因為時數只有一節，教學無法度放盡磅；甚至有一部份外聘ê台語老師，教學猶原無夠專業。

雖然台語是弱勢ê課程，但是有比無khah好。學校一般ê課程因為ài考試，家長kap老師lóng khah重視，相對學生ê壓力khah大，ē減少學習ê興趣。台語因為免考試、khah無受重視，無成績ê壓力，老師ē-tàng自由發揮；其實，tse是台語課提升教學品質上好ê本錢，若ē-tàng增加輕鬆、趣味ê互動，囡仔一定真愛上課。

有人認為tī學校教台語，上蓋無聊ê單元就是羅馬字。我kā囡仔講，tse就是「台灣字」。以我ê經驗，學羅馬字是囡仔真心適ê單元。講一寡教羅馬字ê經驗kap逐家分享：揣一寡kap母音抑是子音有關係ê詞來教，譬如講「a」，先hōo囡仔發揮，看啥物詞kap「a」有關係？通常囡仔ē講：阿公、阿媽、阿爸、鴨仔等。M̄-koh lán是老師，ài揣一寡囡仔m̄-bat ê新鮮詞來教囡仔，hōo學生ke學--一-寡。

下面我舉一寡囡仔khah少聽--著ê台語詞，hōo逐家做參考。「a」：阿不倒（『不倒翁』）。「i」：椅liâu（『長板凳』）。「o」：tâng-o-á（『茼蒿』）。「oo」：oo-àng-tshǹg（『黑鮪魚』）。「m」：草m̂（『草莓』）。「ng」：koo-n̂g（『貓頭鷹』）、播秧仔（『插秧』）、ng-ng-iap-iap（『躲躲藏藏』）。「au」：茶甌（『小茶杯』）。「ia」：ing-ia（『灰塵』）。「io」：腰子（『腎臟』）、腰尺（『胰臟』）。「ua」：無ta-ûa（『無可奈何』）。「am」：am-poo-tsê（『蟬』）、喙am-á（『口罩』）。「im」：im-thim（『心機很重』）。「in」：因端（in-tuann，原因）。「un」：勻勻仔（『慢慢地』）。「ang」：海翁（『鯨魚』）。「iau」：iau-sâi（『很貪吃』）。「iam」：閹豬（『豬結紮』）。「iang」：央託（拜託）。「uang」：uang黨（『交群結黨』）。「inn / enn」：田inn / enn（『蜻蜓』）。「ainn」：āinn巾（『背巾』）。「iann」：奢颺（tshia-iānn，『很風光』）。「iunn」：羊眩（『羊癲』）。「p」：夜婆（『蝙蝠』）。「ph」：phò-tāu（開講）。「k」：糕仔餅。「kh」：洘流（khó-lâu，『退潮』）。「h」：河豬（『河馬』）。「b」：石磨仔（tsio̍h-bō-á）。「g」：徛鵝（『企鵝』）。「iap」：iap尾狗（『夾著尾巴的狗』）。簡單ê詞hōo囡仔自由發揮，khah少聽--著ê詞老師來補充；以我ê經驗教羅馬字，囡仔lóng感覺真心適。

我認為，學校除了ài積極外聘專業ê台語教師，教育mā無應該限定tī台語課tsiah教囡仔台語，逐種課程lóng ē-tàng用台語來教。家庭教育方面，家長mā ài有新ê觀念：Ē-hiáu羅馬字對學外語有幫贊。親像我ê細囝tuì細漢我就教伊台語羅馬字，伊對拼音文字自然就有真大ê興趣。

政府對本土語言ê教育政策ài有延續性，若順其自然hōo體制內、非台語專業ê老師án-ne凊彩教--落-去，tse叫做『安樂死』，只是延長本土語言死亡ê時間nā-tiānn。教育部規定在職教師只要培訓三十六點鐘，就ē-tàng教台語；我mā ē-hiáu講華語，是m̄是所有ē-hiáu講華語ê人，只要培訓三十六點鐘，就ē-hiáu教中文？政府若有心beh推sak本土語言，應該排除萬難、聘請專業ê本土語言教師；tse，是我tsit个培訓體制內ê教師深刻ê感想。