Lō͘-ka hok-im 13:1-9@Choân Tâi-gí Chhú-kéng Cha-keng-pan

Choân Tâi-gí Chhú-kéng Cha-keng-pan(全台語處境查經班)

The CBS’ Sandwich：See – Judge – Act

Hia̍p-tiau-chiá：黃春生/N̂g ChhunSeng、林世鴻/Lîm SèHông

Sèng-si：洪敦昱/Âng Tun-io̍k

Keng-bûn：Lō͘-ka hok-im 13:1-9《Choân-bîn Tâi-gí Sèng-keng》

Bô Hóe-kái Chiū Ē Bia̍t-bông

1 Tú hit sî, ū kúi-nā-ê lâng lâi, kā Ga-lí-la-iah lâng tī chè-tôaⁿ hiàn chè ê sî hō͘ Pí-la̍h-to sat-hāi ê tāi-chì kā I-é-su kóng. 

2 I-é-su ìn kóng, " In-ūi chiah-ê Ga-lí-la-iah lâng siū chit khoán ê sat-hāi, lín siūⁿ kóng in pí chèng Ga-lí-la-iah lâng hoān khah tāng ê chōe, sī-bô? 

3 Góa kā lín kóng, m̄-sī. Lín nā bô hóe-kái, lóng ē chhin-chhiūⁿ án-ne bia̍t-bông. 

4 Á-sī lín siūⁿ kóng hō͘ Si-ló-ám ê thah tó lo̍h-lâi teh-sí hit cha̍p-peh ê lâng, in pí kî-tha tòa tī Ê-lú-sa-lèm ê lâng hoān khah tāng ê chōe, sī-bô? 

5 Góa kā lín kóng, m̄-sī. Lín nā bô hóe-kái, lóng ē chhin-chhiūⁿ án-ne bia̍t-bông. "

Bô Kiat Kóe-chí ê Bû-hoa-kó Chhiū ê Phì-jū

6 Āu-lâi, I-é-su ēng chi̍t-ê phì-jū kā in kóng, " Ū chi̍t-ê lâng tī i ê phû-tô hn̂g-.ni̍h chai chi̍t châng bû-hoa-kó chhiū. I lâi hit-châng chhiū chhōe kóe-chí, chhōe lóng bô. 

7 I tùi kò͘ hn̂g ê kóng, ' Lí khòaⁿ, góa liân-liân saⁿ nî lâi chit châng bû-hoa-kó chhiū chhōe kóe-chí, lóng chhōe bô. Tio̍h kā i chhò khí-.lâi! Ná-tio̍h lâu-.leh tìn ūi? '

8 Kò͘-hn̂g ê ìn kóng, ' Chú-lâng, kin-nî chhiáⁿ koh kā i lâu chi̍t nî khòaⁿ-māi, góa lâi kā sì-kho͘-ûi ku̍t-sang koh lo̍h-pûi. 

9 Mê-nî nā kiat kóe-chí to̍h hó, nā bô, chiah kā i chhò khí-.lâi. '"

無悔改就會滅亡

1 Tú hit時，有幾nā个人來，kā加利利人tī祭壇獻祭ê時hō͘彼拉多殺害ê tāi-chì kā耶穌講。

2 耶穌應講：「因為chiah-ê加利利人受chit款ê殺害，lín想講in比眾加利利人犯khah重ê罪，是無？

3 我kā lín講，m̄是。Lín若無悔改，lóng會親像án-ne滅亡。

4 Á是lín想講hō͘西羅亞ê塔倒落來teh死hit十八個人，in比其他tòa tī耶路撒冷ê人犯khah重ê罪，是無？

5 我kā lín講，m̄是。Lín若無悔改，lóng會親像án-ne滅亡。」

無結果子ê無花果樹ê譬喻

6後來，耶穌用一個譬喻kā in講：「有一个人tī伊ê葡萄園裡栽一叢無花果樹。伊來hit叢樹chhōe果子，chhōe lóng無。

7 伊對顧園ê講：『你看，我連連三年來chit叢無花果樹chhōe果子，lóng chhōe無。Tio̍h kā它剉起來！Ná-tio̍h留teh tìn位？』

8 顧園ê應講：『主人，今年請koh kā它留一年看māi，我來kā四箍圍掘鬆koh落肥。

9 明年若結果子to̍h好，若無，chiah kā它剉起來。』」

Būn-tôe thó-lūn：

一、Tùi chi̍t-toān keng-bûn, lí ū khòaⁿ tio̍h sím-mih？(jîn-bu̍t, chú-tê…)

二、Ū lâng lâi kā I-é-su kóng hit-sî ê thâu-tiâu sin-bûn,“Ga-lí-la-iah lâng tī chè-tôaⁿ hiàn chè ê sî hō͘ Pí-la̍h-to sat-hāi”, I-é-su kah kûn-chiòngjû-hô pêng-lūn？

(Su-khó: Chai-lān sī in-ūi chia-ê lâng kah ū chōe mā？)

三、Tùi I-é-su kóng ê bû-hoa-kó chhiū ê phì-jū, Lí jīm-uî I-é-su beh piáu-ta̍h sím-mih？

四、Chi̍t-toān keng-bûn tùi kin-ji̍t ê kàu-hōe tê-kiong ím-mih ì-gī ah-sī hoán-séng？