Lō͘-ka hok-im 11:14-26@Choân Tâi-gíChhú-kéng Cha-keng-pan

Choân Tâi-gí Chhú-kéng Cha-keng-pan(全台語處境查經班)

The CBS’ Sandwich：See – Judge – Act

Hia̍p-tiau-chiá：黃春生/N̂g ChhunSeng、林世鴻/Lîm SèHông

Sèng-si：李新元/ Lí Sin-Goân  聖詩614《我心恬靜》(Be Still My Soul)

Keng-bûn：Lō͘-ka hok-im 11:14-26《Choân-bîn Tâi-gí Sèng-keng》

耶穌kah別西卜ê爭議

14耶穌趕一個啞口邪神出去，啞口ê人就講話。群眾lóng感覺奇怪。

14 I-é-su kóaⁿ chi̍t-ê é-káu siâ-sîn chhut-.khì, é-káu ê lâng chiū kóng-ōe. Kûn-chiòng lóng kám-kak kî-koài. 

15 其中有幾nā个人講：「祂趕鬼是靠鬼王別西卜。」

15 Kî-tiong ū kúi-nā-ê lâng kóng, " I kóaⁿ kúi sī khò kúi-ông Be̍h-che-bul. "

16 Koh有人beh試探耶穌，要求祂行tùi天來ê神跡。

16 Koh ū lâng beh chhì-thàm I-é-su, iau-kiû I kiâⁿ tùi thiⁿ lâi ê sîn-jiah. 

17 耶穌知in ê心思，就kā in講：「國家若家己起紛爭就會拋荒，家庭若bē hô一定會破碎。

17 I-é-su chai in ê sim-su, chiū kā in kóng, " Kok-ka nā ka-kī khí hun-cheng chiū ē pha-hng, ka-têng nā bē hô it-tēng ē phòa-chhùi. 

18 撒旦若家己起紛爭，伊ê國ná khiā會tiâu？Lín講我靠別西卜趕鬼，

18 Sa-tán nā ka-kī khí hun-cheng, i ê kok ná khiā ē tiâu? Lín kóng góa khò Be̍h-che-bul kóaⁿ kúi, 

19 我若是靠別西卜趕鬼，lín ê子弟趕鬼是óa靠啥人lè？Án-ne，lín ê子弟會反駁lín ê講法。

19 Góa nā-sī khò Be̍h-che-bul kóaⁿ kúi, lín ê chú-tē kóaⁿ kúi sī óa-khò siáⁿ lâng lè? Án-ne, lín ê chú-tē ē hoán-po̍k lín ê kóng-hoat. 

20 總是，我若靠上帝ê氣力趕鬼，上帝國度就已經tī lín ê中間。」

20 Chóng-.sī, góa nā khò Siōng-tè ê khùi-la̍t kóaⁿ kúi, Siōng-tè kok-tō͘ chiū í-keng tī lín ê tiong-kan. "

21 「勇士若穿盔甲，gia̍h ke-si teh顧守伊ê厝，伊所有ê財產就安全。

21 " Ióng-sū nā chhēng khoe-kah, gia̍h ke-si teh kò͘-siú i ê chhù, i só͘-ū ê châi-sán chiū an-choân. 

22 總是，若有一个比伊khah猛ê來phah贏伊，就會kā伊所óa靠ê全副武器搶去，koh kā伊ê財物分了了。

22 Chóng-.sī, nā ū chi̍t-ê pí i khah béng ê lâi phah-iâⁿ i, chiū ē kā i só͘ óa-khò ê choân-hù bú-khì chhiúⁿ-.khì, koh kā i ê châi-bu̍t pun liáu-liáu. 

23 「無為我ê人to̍h是kah我對敵。無協助我ê人to̍h是teh kā我破壞。」

23 " Bô ūi góa ê lâng chiū-sī kah góa tùi-te̍k. Bô hia̍p-chō͘ góa ê lâng chiū-sī teh kā góa phò-hoāi. "

邪神倒Tńg來

24「邪神離開附身ê人了後，經過無水ê地，beh chhōe歇睏ê所在chhōe lóng無，就講：『我beh tńg去我tùi hia出來ê hit間厝。』

24 " Siâ-sîn lī-khui hū-sin ê lâng liáu-āu, keng-kòe bô chúi ê tē, beh chhōe hioh-khùn ê só͘-chāi chhōe lóng bô, chiū kóng, ' Góa beh tńg-khì góa tùi hia chhut-.lâi ê hit keng chhù. '

25 Tńg去到位一看，厝內拚掃kah真清氣koh整齊。

25 Tńg-khì-kàu ūi chi̍t khòaⁿ, chhù lāi piàⁿ-sàu kah chin chheng-khì koh chéng-chê. 

26 Hit-ê邪神就koh去帶七個比家己khah pháiⁿ ê邪神來，入去hia tòa。Hit-ê人ê結局比起頭koh khah慘。」

26 Hit-ê siâ-sîn chiū koh khì tòa chhit ê pí ka-kī khah pháiⁿ ê siâ-sîn lâi, ji̍p-khì hia tòa. Hit-ê lâng ê kiat-kio̍k pí khí-thâu koh khah chhám. "

Būn-tôe thó-lūn：

一、Tùi chi̍t-toān keng-bûn, lí ū khòaⁿ tio̍h sím-mih？

二、I-é-su kóaⁿ chhut chi̍t-ê é-káu siâ-sîn, Kûn-chiòng lóng kám-kak kî-koài. Tān-sī ā-ū lâng beh chhì-thàm I-é-su. Lí jīn-uî chia-ê lâng ūi sím-mih beh hām-hāi I-é-su？

三、Tīkim-ji̍tchhú-kéng tiong“é-káu siâ-sîn” chhin-chhiūⁿ sím-mih teh sok-pa̍klâng？

四、Tīkim-ji̍t“é-káu” siū tháu-pàng liáu-aū, lû-hô pī-bián koh khá-tōa ê sok-pa̍k？