Lō͘-ka hok-im 18:18-30＠Choân Tâi-gí Chhú-kéng Cha-keng-pan

Choân Tâi-gí Chhú-kéng Cha-keng-pan(全台語處境查經班)

The CBS’ Sandwich：See – Judge – Act

Hia̍p-tiau-chiá：黃春生/N̂g Chhun-Seng、林世鴻/Lîm Sè-Hông

Sèng-si：

Keng-bûn：Lō͘-ka hok-im 18:18-30《Choân-bîn Tâi-gí Sèng-keng》

Hó-gia̍h ê Koaⁿ-oân(Mt 19:16-30; Mk 10:17-31)

18 Ū chi̍t-ê Iô-tá-iah lâng ê koaⁿ-oân lâi mn̄g I-é-su kóng, " Hó ê lāu-su ah, góa tio̍h án-chóaⁿ chò chiah ē-tàng tit-tio̍h éng-oán ê oa̍h-miā? "

19 I-é-su kā i kóng, " Lí ná ē chheng-ho͘ góa sī hó à? Siōng-tè í-gōa bô chi̍t-ê sī hó. 

20 Lí tong-jiân lóng bat chiah-ê kài-bēng, chiū-sī, M̄-thang kan-îm, m̄-thang thâi-sí-lâng, m̄-thang thau-the̍h, m̄-thang lām-sám chò kiàn-chèng, tio̍h hàu-kèng lí ê pē-bú. " (chù, SBK 5:16-20; chhut 20, 12-16)

21 Hit-ê lâng kóng, " Chiah-ê kài-bēng góa chū sè-hàn to̍h lóng ū teh chun-siú. "

22 I-é-su thiaⁿ-tio̍h chiah-ê ōe chiū kā i kóng, " Lí iáu khiàm chi̍t hāng; tio̍h khì bē lí só͘-ū ê châi-sán lâi pun hō͘ sàn-chhiah lâng, án-ne, lí chiū ū chek-chū châi-pó tī thiⁿ-téng, jiân-āu chiah lâi tòe góa. "

23 Hit-ê lâng thiaⁿ-tio̍h chiah-ê ōe chin iu-būn, in-ūi i chin hó-gia̍h. 

24 I-é-su khòaⁿ-tio̍h hit-ê lâng teh iu-būn chiū kóng, " Hó-gia̍h lâng beh ji̍p-khì Siōng-tè kok-tō͘ chin khùn-lān! 

25 In-ūi lo̍k-tô chhng-kòe chiam-phīⁿ, pí hó-gia̍h lâng ji̍p Siōng-tè kok-tō͘ iáu khah kán-tan! "

26 Thiaⁿ-kìⁿ chiah-ê ōe ê lâng mn̄g kóng, " Án-ne, siáⁿ lâng chiah ē-tàng tit-tio̍h kiù? "

27 I-é-su ìn kóng, " Lâng só͘ chò bē-kàu ê, Siōng-tè lóng ē. "

28 Piat-tò͘ kóng, " Goán í-keng pàng-sak ka-kī só͘-ū ê lâi teh tòe Lí. "

29 I-é-su kā in kóng, " Góa si̍t-chāi kā lín kóng, lâng nā ūi-tio̍h Siōng-tè kok-tō͘ lâi pàng-sak chhù-the̍h, bó͘, hiaⁿ-tī, pē-bú á-.sī kiáⁿ-jî, 

30 Tī kim-sè ē tit-tio̍h kúi-nā pōe ê pò-siúⁿ, tī lâi-sè ē tit-tio̍h éng-oán ê oa̍h-miā. "

好額ê官員(太19:16-30；可10:17-31)

18 有一个猶太人ê官員來問耶穌講：「好ê老師ah，我tio̍h án怎做chiah ē-tàng得tio̍h永遠ê活命？」

19 耶穌kā伊講：「你ná會稱呼我是好à？上帝以外無一个是好。

20 你當然lóng bat chiah-ê誡命，to̍h是：M̄-thang姦淫，m̄-thang刣死人，m̄-thang偷the̍h，m̄-thang lām-sám做見證，tio̍h孝敬你ê父母。」(註：申5:16-20；出20:12-16)

21 Hit-ê人講：「Chiah-ê誡命我自細漢to̍h lóng有teh遵守。」

22 耶穌聽tio̍h chiah-ê話就kā伊講：「你iáu欠一項；tio̍h去賣你所有ê財產來分hō͘ sàn-chhiah人，án-ne，你就有積聚財寶tī天頂，然後chiah來tòe我。」

23 Hit-ê人聽tio̍h chiah-ê話真憂悶，因為伊真好額。

24 耶穌看tio̍h hit-ê人teh憂悶就講：「好額人beh入去上帝國度真困難！

25 因為駱駝穿過針鼻，比好額人入上帝國度iáu khah簡單！」

26 聽見chiah-ê話ê人問講：「Án-ne，啥人chiah ē-tàng得tio̍h救？」

27 耶穌應講：「人所做bē到ê，上帝lóng會。」

28 彼得講：「阮已經放sak家己所有ê來teh tòe祢。」

29 耶穌kā in講：「我實在kā lín講，人若為tio̍h上帝國度來放sak厝宅、bó͘、兄弟、父母á是kiáⁿ兒，

30 tī今世會得tio̍h幾nā倍ê報賞，tī來世會得tio̍h永遠ê活命。」

Būn-tôe thó-lūn：

一、Tùi chi̍t-toān keng-bûn, lí ū khòaⁿ tio̍h sím-mih？(jîn-bu̍t, chú-tê…)

二、Lí jīn-tông keng-bûn tiong tó chit-ê kak-sek？

三、Chú I-é-su tùi hó-gia̍h ê koaⁿ-oân ê iau-kiû kah I ê thê-būn ū sím-mih koan-liân？

四、Chi̍t-toān keng-bûntùi kim-ji̍t khùn-kéng tiong ê lâng thê-kiong sím-mih khé-hoat？

" Góa si̍t-chāi kā lín kóng, lâng nā ūi-tio̍h Siōng-tè kok-tō͘ lâi pàng-sak chhù-the̍h, bó͘, hiaⁿ-tī, pē-bú á-.sī kiáⁿ-jî, Tī kim-sè ē tit-tio̍h kúi-nā pōe ê pò-siúⁿ, tī lâi-sè ē tit-tio̍h éng-oán ê oa̍h-miā. "

放sak厝宅、bó͘、兄弟、父母á是kiáⁿ兒，m̄-sī bô-beh chīn chhin-chêng ê 責任。nái sī beh 提醒 lán in ê 主權 m̄-sī tī lí ê 手，是 tī 上帝ê手。

五、Jû-hô tī tong-tāi ê Tâi-oân chhú-kéngtiong si̍t-chiān I-é-su ê kàu-hùn？